محمد صلاح يستمر مع ليفربول ويرفض عروض الدوري السعودي

القرار اللي محمد صلاح أخذه بالاستمرار مع ليفربول رغم عرض اتحاد جدة الخيالي والخرافي واللي عايز تقوله عنه قول هو قرار تاريخي بكل ما تحمله الكلمة من معنى وبدون أي مبالغات.

محمد صلاح عُرض عليه راتب حوالي 2.45 مليون جنيه إسترليني في الأسبوع، يعني حوالي 8 أضعاف راتبه الحالي مع نادي ليفربول، وهو في سن الـ31 سنة يعني قدامه في المستوى العالي دا بالكتير 4 سنين، مستحيل يجيله زي العرض دا تاني، ومن دوري بقا هو ملتقى النجوم دلوقتي واللي واخد “التريند” عالميًا مش دوري لعيبة معتزلة ولا هو رمي فلوس وخلاص، لكنه رغم كل دا رفض من أجل حلم العالمية.

تحليلي الشخصي لرفض محمد صلاح، أو ع الأقل صموده وعدم ضغطه على ليفربول عشان يوافقوا على العرض -واللي لو كان حصل بالمناسبة كان هيبقى مُبرر جدًا- هو إنه لسة بيحلم بتحقيق الحلم الأكبر، أحسن لاعب في العالم، الموضوع صعب بلا أدنى شك وقد يكون أقرب للمستحيل خاصةً مع وضع ليفربول الحالي لكنه يبقى حلم وهو بيطارده.

الساحة حاليًا بقت فاضية أكتر من زمان بخروج رونالدو وميسي وبنزيما من أوروبا، والمنافسان الرئيسيان هيبقى هالاند ومبابي وبعدهم علطول يجي اسم محمد صلاح اللي خلاص ثبت اسمه وسط قائمة مخترصة للأفضل في العالم باستمراريته ومستواه العظيم على مدار سنين طويلة في الدوري الأصعاب في العالم، بالتالي فرصته قائمة حتى لو مش السنة دي مع وضع ليفربول وعدم مشاركته في دوري الأبطال وهكذا، لكن يبقى حلم ممكن مع تحسن الفريق في السنوات الجاية.

محمد صلاح مضعفش زي ما لعيبة كتير عالمية ضعفت وكان ليهم كل الحق في إنهم يضعفوا قدام إغراءات الدوري السعودي الخذعبلية، وقرر يتمسك بحلمه ويطارده لحد آخر نفس، قرار هفضل اعتبره تاريخي ومُلهم بكل ما تحمله من معنى.